انتخابات العزبه على الابواب

فى عزبتنا عزبه العمده حمدان كل شئ هادى ومنظم وبسيط وسهل ومتوافر للجميع

الا من بعض الحاجات الصغيره فى نظر العمده

اللى بتنغص على الناس عشتها

زى الميه اللى بيشربوها من المصرف المفتوح جديد

وزى المستوصف اللى مافيهوش الا التمرجى حقننه وحقنته الشهيره فى علاج كل الامراض

وهيا حقنه سحريه بتعالج كل الامراض ومن غير اى كشف

بمجرد ماتروح المستوصف تلقى حقننه واقفلك وفى ايده حقنه غريبه يغرزها فى ...... ويقولك بالشفاء

وطبعا ماحدش يقدر ينسى دور شيخ الغفر اللى مانع الناس من انهم يمشوا فى الشارع ولا يعملوا اى افراح ولا اى تجمعات

وطبعا صلاه الجمعه هوا المكان الوحيد الللى الناس بتشوف فيه بعض ولمده 5 دقايق بعدها اللى يفضل واقف يتمسك ويتحط فى التخشيبه

المهم ............

الحاجات دى كلها وغيرها اهل العزبه اتعودت عليها

فى يوم من الايام ولقرار غريب من العمده قرر انه يعمل انتخابات على منصبه كل كام سنه

وممكن لاى حد انه يترشح فى الانتخابات

فظهر الاستاذ الكبير خالد الشوادفى وقال انا هترشح للمنصب دا

وطبعا الاستاذ خالد هوا الوحيد فى اهل العزبه اللى بيعرف يفك الخط

بعد ضغط الناس عليهم وعشان انقذ العزبه من الجهل والتخلف اللى فيها

وطبعا الاستاذ قدم نفسه وبداء بنشر اليفط اللى فيها صورته بس لانه عارف ان اهل العزبه مش هيعرفوا يقروا لو كتب حاجه على اليفط

وحط جنب صورته صوره ست وشايله فى ايدها حمامه بيضه تعبيرا عن السلام

وفى الايد التانيه حط مدرسه اعلانا انه هيبنى مدرسه لمحاربه الجهل فى العزبه

المهم . ..........

لما حضره العمده حمدان عرف بالموضوع قال :

لو الشوادفى دا اترشح انا مش هنجح ى الانتخابات لان كل البلد بتحبه

قام رد عليه الغفير بتاعه عزمى نمليا وقاله :

احنا فى عزبه دمقرطيه ماينفش اننا نلغى ترشيحه اونقتله او نسجنه

احنا نسيبه يعمل اللى ما بداله كله

ونزور فى اللجان ونحط اللى احنا عايزينه من اصوات

ولما تخلص الانتخابات نلفقله اى تهمه زى الواد المغنواتى اللى سبقه ايمن بعرور

وندخله السجن

وماتخافش يا عمده

الكرسى مش هيروح لحد بعدك غير ابنك الواد هلال

ومازالت معركه الانتخابات مستمره واللى اللقاء فى تكمله باقى حلقاتها ونشوف فيها اللى حصل

فى العزبـــــــــه

جميل اوى الافكار يا جوبا

بس فكرك انهم لفقو للمغنواتى التهمه

وهما عملو معاه ايه

تسلم دماغك يا صديقى

وفى انتظار باقى الحلقات

مش عايزين نستنى كتير ماشى

المشكله دلوقتى يا صديقى مش فى المغنواتى ولا فى التهمه اللى موجهه ضده

لان دوره انتهى خلال من الواقع

حتى اللى بيعمله ما بقاش يجيب فايده

المشكله الحقيقه دلوقتى هتكون فى كاتب العزبه خالد الشوادفى

ياترى هيعملوا معاه ايه

مانت عارف العمديه محجوزه مسبقا

وكفايا كلام بقا

بجد كل شخصياتك لامسة الواقع اللي عايشينة
والقصة روعة فعلا تسلم ايدك يا مبدع المنتدي